Hoi zäme!

Nach guet emä Jahr Pousä mäldä mir üs zrügg mit Neuigkeitä. Das Jahr hett üs e chli zum Nachedäichä agregt u mir hei gli gmerkt, das mir öppis wei ändärä. Mir hei üs entschlossä, üses erfolgriichä Gastrokonzept i derä Form ufdsgäh. Zudäm hett sech d Diana nach 20 Jahr Kosmetikpraxis o entschiedä ufdshörä. Beides si sehr erfolgriichi und schöni Projekt gsi.

Mängisch hei mir bis zu 350 Gäscht bi üs i Form vo Hochzyt, Geburstäg etc. dörfä begrüessä. Vieli wärtvolli u idrücklächi Begägnigä hei sich i denä acht Jahr i üses Härz prägt. Die zuehnämendi Grössi vo de Aläss hett üs a üsi eigetä Gränzä u o a d Gränzä vor Infrastruktur bracht. Zudäm geischterä o no angeri Zuekunftsplän i üsnä Chöpf ume, wo mir wettä realisierä.

Diana macht das Jahr no der zwöit Teil vor eidgenössischä Bestatterprüefig ds Willisau u Küsu möchti sech näb sirä Arbeit ds Steffisburg gärn me sinä Isebahnä u der Umgäbig vom Spitzistei widmä.

Mir wettä üs vo Härzä bi Euch, üserä Gaschtig bedankä. Ohni Eui Treui wäri das alls gar nid müglech gsi.

D Wyberwirtschaft uf em Spitzestei

Ds Loslah zur richtigä Zyt git aber o viel neui Feiheitä…Drum isch quasi uf em Guafförstuehl ds Biglä d „Wyber-wirtschaft“ entstandä. Wyber u Wirtschaft - mir si drü Froue u o drü sälbstständegi Gschäftsfroue. Es freut üs sehr, dass d Twins Manuela Käser u d Sandra Maier mit üs das neue Abentüür teilä.

Das Abentüür faat scho am Muettertag am 12. Mai 2019 a. Ungerem Motto „Heute ist Mutti die Queen“ schwörä mir em üblechä Muettertagsbrunch ab u verwöhnä Euch mit ere Teatime, wie si äuä o nid minger ds Ängland bim Lisi zelebriert wird. Für aui hetts de öppis uf däm königlichä Buffet. Für Süess-Schnäbel Lemon Curd Tart , Scones mit Clotted Cream u Confi, Battenberg Cake, Shortbread, Schoggiärdbeeri u no gaaanz viel meh bietet d Schatz-chischtä vor Kulinarik.

Für die , wo‘s lieber härzhaft hei, hi mir natürlech o einiges parat wie Lord Sandwiches mit Gurkä, Ei, Lachs u Roastbeef, Cheddar Tarts, Wurströlleli u o gaaaanz viel meh. Derzue git‘s Teegebräu us Ängland , für d Kids natürlech o e heissi Schoggi u für ds Mami u der Papi e fruchtigä Drink mit Sekt u Whyski.

Ds Muetti, d Königin vom Tag erwartet bi üs no e Überraschig.

D Morning Teatime isch vo 11.00 bis am 14.00 oder we Dir lieber am Nami chömet, erwartä mir Euch gärn ar Afternoonteatime vo 14.00 bis am 17.00.

I Eurer Schatztruckä söttä folgendi Batzä parat si: Erwachseni 45.00 inkl. Heissgetränk wie Tee, Kafi, Kakao, exkl. Drinks / Chinder bis zwöufi 25.00 inkl.Heissgetränk wie Tee, Kakao oder o es Sirup.

Wüll d Platzzahl i üsem Spycher limitiert isch, geits nid ohni Reservation. Uf 079 363 66 02 (Diana) chöit Dir alüttä oder es SMS schriibä.

Mir freue üs sehr, Euch a däm königlechä Tag i üsere „Wyberwirtschaft“ ds empfah.

Ganz härzlech, euer Wyber vom Spitzestei

Diana Wälti und Markus Niederhauser

Spitzenstein 240

3508 Arni

079 363 66 02 / Diana Wälti